Ministiri w’intebe Pierre Damien Habumuremyi yagiriye uruzinduko rw’iminsi ibiri mu ntara y’uburengerazuba.

Ku munsi wa mbere  w’urwo ruzinduko basuye  akarere ka Karongi ahakorerwa imirimo yo kubaka  urugomero  rw’amashanyarazi ku mugezi wa Nyabahanga mu Murenge wa Bwishyura  akagari ka Kayenzi umudugudu wa Nyabikenke.     Ministre w’Intebe akaba yarishimiye uko iyo mirimo ikorwa. Yasabye ubuyobozi bw’akarere  ka Karongi ko icyo gikorwa bagomba kukigira icyabo. Mu rwego rwo kwihutisha iyo mirimo, yanasabye ubuyobozi bwa EWSA ko mu byumweru bibiri umuturage wese uzahabwa umuriro agomba kuba afite cash power ku nzu ye  kandi n’ibiti by’umuriro (poteaux electriques) bigomba kuba byahageze. Urwo rugomero rwa Nyabahanga imirimo yo kurwubaka yatangiye mu mwaka wi 2008 iza guhagarara bitewe na rwiyemezamirimo wabuze ubushobozi, ariko kuri ubu imirimo yo kurwubaka ikaba igenda neza, aho ruteganywa kurangira nyuma y’amezi abiri n’igice uhereye ubu. Biteganywa ko ruzarangira kubakwa rufite ubushobozi bwa Kwh 200 rukazacanira  ingo 2000 zo mu mirenge ya Bwishyura na Gitesi, nk’uko byasobanuwe na  Enjeniyeri (engeneer) Emmanuel Hategekimana. Yavuzeko mu Rwanda hari izindi ngomero eshanu ziri gutunganywa, harimo urwa Janja (Gakenke), Gashashi (Rutsiro), Mukungwa(Burera), Nshiri(Nyaruguru) na Nyirabuhombohombo(Nyamasheke). Izo ngomero zose zirateganywa kurangira mu mezi icyenda.

Uruzinduko rwa Ministri w ‘intebe ku munsi warwo wa kabiri yarukomereje mu karere ka Rubavu na Nyabihu.